ភ្នំពេញ៖ ប្រធានរដ្ឋសភាកម្ពុជា សម្ដេចពញាចក្រី ហេង សំរិន បានផ្ញើរសាររំលែកមរណទុក្ខថ្វាយដល់ព្រះអង្គម្ចាស់ក្សត្រី នរោត្រម ម៉ារី រណឬទ្ធិ ចំពោះការយាងចូលព្រះទិវង្គតរបស់សម្ដេចក្រុមព្រះ នរោត្តម រណឬទ្ធិ នឹងបានចាត់ទុកការសោយទិវង្គតរបស់សម្ដេចក្រុមព្រះ ជាការបាត់បង់ឥស្សរៈជនក្នុងរាជវង្សដ៏ឆ្នើមមួយអង្គដែលបានចូលរួមជួយជាតិមាតុភូមិដោយឆន្ទៈដ៏មុះមុត។

សម្ដេចពញាចក្រីបានលើកឡើងបន្ថែមថា៖ «ការបាត់បង់សម្ដេចក្រុមព្រះ នរោត្តម រណឬទ្ធិ ដែលជាព្រះរាជឥស្សរជនក្នុងព្រះរាជវង្សមួយព្រះអង្គ ដែលមិនត្រឹមតែជាបញ្ញាវន្តដ៏ឆ្នើមមួយព្រះអង្គប៉ុណ្ណោះទេ តែជាការបាត់បង់នូវឥស្សរជនជាន់ខ្ពស់មួយរូប ដែលបានបូជាកម្លាំងព្រះកាយពល និងព្រះបញ្ញាញាណ ព្រមទាំងបានរួមចំណែកដ៏សំខាន់ក្នុងការបម្រើជាតិ សាសនា ព្រះមហាក្សត្រ។ [..] ទូលបង្គំជាខ្ញុំនិងភរិយាសូមបួងសួងថ្វាយព្រះកុសលព្រះវិញ្ញាណក្ខន្ធសម្តេចក្រុមព្រះ នរោត្តម រណឫទ្ធិ សូមទ្រង់យាងសោយសុខក្នុងព្រះសុគតិភពគ្រប់ៗព្រះជាតិកុំបីឃ្លៀងឃ្លាតឡើយ» ។

សម្តេចក្រុមព្រះ នរោត្តម រណឫទ្ធិ បានយាងចូលទីវង្គតនៅព្រះជន្មាយុ៧៧វស្សា ដោយព្រះរោគាពាធ ក្នុងប្រទេសបារាំងកាលពីព្រឹកថ្ងៃទី២៨ ខែវិច្ឆិកាម្សិលមិញ។

ព្រះអង្គប្រសូតនៅថ្ងៃទី២ ខែមករា ឆ្នាំ១៩៤៤ គឺជាបុត្រទី២របស់សម្ដេចព្រះនរោត្តម សីហនុ និងអ្នកម្នាង ផាត់ កាញ៉ុល។ ព្រះអង្គធ្លាប់ធ្វើជានាយករដ្ឋមន្ត្រីទី១ ពីឆ្នាំ១៩៩៣ ដល់ឆ្នាំ១៩៩៧ និងបានក្លាយជាប្រធានសភាជាតិពីឆ្នាំ១៩៩៨ ដល់ឆ្នាំ២០០៦៕